ISANG DAPIT-HAPON SA CENTRAL
Select messages from
# through # FAQ
[/[Print]\]

USAP PAETE -> Tulaan (The Forum of Batang Patio)

#1: ISANG DAPIT-HAPON SA CENTRAL Author: batang_patio PostPosted: Tue Jul 12, 2005 3:54 am
    —
ISANG DAPIT-HAPON SA CENTRAL

Batang Patio
July 12, 2005


May isang panahong sakbibi ng kalungkutan
Magulo ang isipan at walang mapuntahan
Wala pang kalaman-laman yaring lukbutan
Naupo na lang sa isang tabi ng paaralan

Pinagmasdan ang maberdeng kapaligiran
Naghahabulan ang mga bata at naggigirian
Nagkakalabugan ang sahig ng Roces building
Habang ang mga nakakakita ay pailing-iling

Mabilis na naglakbay-diwa’t pumailanglang
Doon sa panahon ng mga humpak ang tiyan
Ang anim na taong ginugol sa eskwelahan
Lumampas, nakaraos kahit maraming kulang

Buhay na walang-wala, daigdig ng mga dukha
Doble ang pagkahig, nakabukang mga tuka
Laging nakamaang sa mayroo’y nakatunganga
Madalas nag-aapuhap sa paligid lilinga-linga

Pagdurusang labis mga gunita ng pagkahapis
Buhay na nasa libis ang luha’y namalisbis
Bitak-bitak ang palad sa yaman ay salat
Mga binhing ipinunla’y sa hirap nagmulat

Basag na espehong sumasalamin sa balintataw
Magandang kinabukasan ang pilit na tinatanaw
Mga dusa’t pighati ang doo’y sumasaklaw
Ang pag-asang malabo’y pilit na inaaninaw

Pagsapit ng dapit-hapon kumakalat ang kulimlim
Nagkukubli ang haring araw pagsapit ng dilim
Humihinto ang pagdaloy habang dumidilim
Nagtatago sa ulap, humihimlay ang panimdim

Sa langit tumingala, sa kalawakan nakatingin
Doo’y sumasabog ang mga kislapan ng bituin
Animo’y mga alitaptap sa kanilang pagkutitap
Mga munting ilaw na nag-aagawan sa pagkislap

Nakangiting nagpakita ang mahiwagang buwan
Naghatid ng tanglaw sa kaparangan ng paaralan
Waring nagwikang may panibagong bukas pa naman
At iyo’y maghahatid ng mga pintong bukaskasan!




#2: sa PES Author: ofeliadLocation: Ofelia Ac-ac Demyttanaere PostPosted: Tue Jul 12, 2005 3:03 pm
    —
Hello Aurel na Batang Patio
sa bilis mong humabi akoy pinahanga mo
ito ngang ukol sa central, naala-ala ko
baon sa reses hati pa kami sa singko

kami ni Vigie tig dadalawampera
ibibili pa nga pasalubong ang sobra
sa bunso naming si Ben,ang isang pera
ganitong baon kami'y masaya na

maraming kumusta mahal na kabayan
sana'y palagi kang nasa mabuting kalagayan
salamat sa ..usap.. nagi kang kaibigan
dumami nawa ang iyong angkan

Opel Very Happy

#3: Re: Sa Quinale Ako!!! Author: eve19612000Location: Sheba Allenbach-Aseoche PostPosted: Wed Jul 13, 2005 1:22 am
    —
Au, ibabahagi ko din ang aking pinagmulan...Null Ahnung ako sa Central...

isa lang ang dumapo sa aking isipan
pasalamatan aking pinagkaka-utangan
mga gurong nagtiyaga't nagsumikap
maabot namin ang aming mga pangarap

Quinale Elementary School ako nag-mula
hindi mabilang ang naiwang mga ala-ala
sa mga guro, kamag-aaral, at mga gusali
higit sa lahat ang anim na taong pananatili

hindi man kalakihan ang aming paaralan
punong-puno iyon ng sigla't kadakilaan
ang bumasa't sumulat doon ko natutunan
maging ang mangatwiran kung kinakailangan

Sa lahat ng naging guro ko sa Quinale Mabuhay po kayo, Maraming Salamat Po...

#4: Opel & Sheba Author: batang_patio PostPosted: Wed Jul 13, 2005 6:36 am
    —
Maraming salamat sa inyo Opel at Sheba
Nakakatuwa dito kulay-kulay pa
May mga emoticons na nakikitawa
At pwedeng ma-edit kapag may mali ka!
Very Happy

#5: Re: sa PES Author: batang_patio PostPosted: Thu Jul 14, 2005 5:22 am
    —
ofeliad wrote:
Hello Aurel na Batang Patio

Salamat Opel, marami lang akong free-time kaya ganoon. May sagot na ako dito kahapon pero magkasama kayo ni Sheba sa sagot, nagmamadali kc ako kahapon, ngayon naman half-day kami at bukas day-off kaya yehey na naman Laughing

regards
aurel



USAP PAETE -> Tulaan (The Forum of Batang Patio)


output generated using printer-friendly topic mod. All times are GMT - 5 Hours

Page 1 of 1

Powered by phpBB © 2001, 2005 phpBB Group